STATUTI

i Federatës së Enigmatëve të Kosovës 

Ky statut do të të qeveris shoqatën joprofitabile Federata e Enigmatëve të Kosovës, të themeluar në pajtim me Rregulloren numër 1999/22 të Administratës së Përkohshme të Misionit të Kombeve të Bashkuara në Kosovë.

Neni 1 – Emri, forma dhe adresa

1. Organizata do të quhet Federata e Enigmatëve të Kosovës.
2. Ajo mund të njihet edhe si FEK.
3. Federata e Enigmatëve të Kosovës (më tutje: Federata, ose FEK) është shoqatë joprofitabile, sipas definimit të dhënë në paragrafin 2.2 të Rregullores së UNMIK-ut numër 1999/22
4. Federata nuk do të bëjë shpërndarjen e çfarëdo fitimi neto ose të profitit si të tillë për asnjë individ. Pasuria, të ardhurat dhe profiti i Federatës do të përdoren për të mbështetur qëllimet joprofitabile të Federatës dhe nuk do të përdoren për të krijuar beneficione të veçanta individuale, qoftë në mënyrë të drejtëpërdrejtë apo indirekte për asnjërin nga themeluesit, kryetarin, nëpunësin, ndonjë anëtar të Federatës, ndonjë të punësuar apo donator të OJQ-së. Megjithatë pagesa e kompensimit të arsyeshëm për këta persona mund të bëhet për punën që këta persona kanë bërë për këtë federatë.
5. Ndonjë transakcion në mes të anëtarëve, anëtarëve të Kryesisë, personi ose nëpunësi dhe Federatës duhet të mbyllet në vlera reale të tregut ose në kushte që janë më të favorshme për Federatën.
6. Federata e ka zyrën e saj qendrore në Prishtinë, rr. Bajram Kelmendi nr. 44.

Neni 2 – Themeluesit

2.1. Themelues të Federatës së Enigmatëve të Kosovës janë: 

1. Zijadin Hasani, rr. Hamdi Kurteshi p.n., Gjilan,
2. Xhelal Abrashi, rr. Sadedin Shehu nr. 5, Gjakovë,
3. Mustafë Statovci, rr. Bajram Kelmendi nr. 44, Prishtinë.

2.2. Përfaqësues i autorizuar i Federatës në Kosovë është Mustafë Statovci, rr. Bajram Kelmendi nr. 44, Prishtinë.

2.3. Përfaqësuesi i autorizuar emërohet nga Bordi dhe duhet të përfaqësojë Federatën në Kosovë dhe të pranojë të gjitha shkresat zyrtare në emër të Federatës. Ai duhet të jetë përgjegjës për informimin e autoriteteve relevante administrative për çfarëdo ndryshimi në Federatë.

Neni 3 – Qëllimi

Organizata është themeluar me qëllim të: 

• zhvillimit dhe masivizimit të enigmatikës në të gjitha viset e Kosovës,
• organizimit dhe afrimit i të gjithë individëve, shoqatave dhe asociacioneve që kultivojnë aktivisht enigmatikën,
• stimulimit të i risive në fushën e enigmatikës,
• planifikimit dhe bashkërendimit të aktiviteteve që zhvillohen në Kosovë në lëmin e enigmatikës,
• organizimit të garave të sajuesëve dhe zgjidhësve të enigmave,
• organizimit të kongreseve, këshillimeve dhe takimeve të enigmatëve,
• afirmimit dhe zhvillimit të enigmatikës nëpërmjet publikimeve të llojeve të ndryshme,
• planifikimit dhe realizimit të bashkëpunimit ndërkombëtar në lëmin e enigmatikës,
• inkuadrimit të Federatës në asociacionet ndërkombëtare të enigmatëve dhe pjesëmarrjes në garat ndërkombëtare të kësaj lëmie.

Për t’i përmbushur qëllimet e saj, organizata do të ndërmarrë, por nuk do të kufizohet vetëm në to, aktivitetet e poshtëshënuara: 

• do të themelojë aktive, seksione dhe shoqata lokale dhe rajonale të enigmatëve në mjediset kosovare ku ekzistojnë kushtet për këtë,
• do të organizojnë kampionate dhe gara të tjera në shkallë vendi nga lëmi i enigmatikës,
• do të bashkëpunojë me organizmat qeveritarë dhe joqeveritarë, të cilët mund ta ndihmojnë zhvillimin dhe avancimin e enigmatikës në Kosovë,
• do të botojë libra dhe publikacione të tjera popullarizuese, profesionale dhe shkencore nga lëmi i enigmatikës,
• do të organizojnë aktivitete të ndryshme që do ta ndihmojë zhvillimin e mëtutjeshëm të enigmatikës në vend.

Neni 4 – Anëtarësimi

4.1. Anëtarësimi në Federatë është i hapur për çdo person pa marrë parasysh racën, gjininë, orientimin seksual, shtetësinë, kombësinë, religjionin, moshën ose aftësitë fizike.

4.2. Kuvendi do të vendosë nëse do të kërkohet pagimi i anëtarësimit nga anëtarët. Mospagesa e anëtarësisë, pas paralajmërimit me shkrim, do të shërbejë si bazë për përjashtimin e anëtarit nga Federata.

4.3. Anëtarësimi i ndonjë anëtari gjithashtu mund të përfundojë ose të suspendohet me vendimin e Kuvendit në rast të heqjes dorë nga anëtarësia e mëtutjeshme, ndërrimit të vendbanimit të përhershëm (shpërngulja jashtë Kosovës), keqpërdorimit të mjeteve materiale apo të pasurisë tjetër të FEK apo të anëtarëve të tjerë kolektivë të Federatës (shoqatave, asociacioneve), në rast të çfarëdo keqpërdorimi tjetër (pozitës, autorizimeve) dhe në rast të sjelljeve që e dëmtojnë autoritetin e Federatës, apo të anëtarëve të tjerë të saj në opinionin publik. Në rast të suspendimit, kohëzgjatja e suspendimit do të përcaktohet.

4.4. Përfundimi ose suspendimi i anëtarësimit nga Kuvendi do të vendoset me shumicë votash të anëtarëve prezentë.

Neni 5 – Kuvendi

5.1. Kuvendi është organi më i lartë qeverisës i Federatës. Ai përbëhet nga përfaqësuesit e të gjitha shoqatave dhe asociacioneve të enigmatëve, që kanë statusin e anëtarëve kolektivë dhe individëve të zgjedhur, anëtarë të Federatës.

5.2. Kuvendi ka përgjegjësinë më të lartë për politikën dhe çështjet financiare të Federatës.

5.3. Përpos kompetencave që ka Kuvendi sipas statutit, ai gjithashtu ka edhe këto kompetenca: 

        - t’i zgjedhë anëtarët e Bordit,

        - të zgjedhë kryetarin e Federatës,

      - t’i aprovojë raportet prej zyrtarëve,

        - të aprovojë përvetësimin e pasurisë mbi vlerën e caktuar,

        - të vendosë për lartësinë e anëtarësimit në FEK,

        - të vendosë për çështjet pronësore-juridike të FEK,

        - të vendosë për anëtarësimin apo ndërprerjen e anëtarësimit në FEK,

        - të vendosë për parashtresa e ankesa,

        - të vendosë për kahet, politikat dhe programet zhvillimore të enigmatikës në Kosovë,

        - të vendosë për bashkëpunimin dhe përfaqësimin ndërkombëtar të FEK,

        - të miratojë statutin e FEK dhe ndryshimet e tij,

        - të miratojë rregulloret dhe aktet e tjera të përgjithshme të FEK,

        - t’i miratojë kriteret e vlerësimit të sukseseve në gara,

        - të vendosë për shpërbërjen e FEK.

5.4. Kuvendi mund të delegojë ndonjë prej përgjegjësive të tij në Bord ose ndonjë organ tjetër, ose edhe të punësuar të organizatës, me vendimin e shumicës së anëtarëve të tij.

Neni 6 – Mbledhjet e Kuvendit

6.1. Kuvendi do të takohet së paku një herë në vit në Mbledhjen e Përgjithshme Vjetore (MPV), ku do të vlerësojë dhe aprovojë mjetet, obligimet, shpenzimet e të hyrave dhe programet për vitet e ardhshme.

6.2. Kuvendi mund të takohet gjithashtu edhe në Mbledhjen e Përgjithshme të Jashtëzakonshme (MPJ) kurdoherë që të kërkohet nga shumica e anëtarëve ose nga Bordi. Një kërkesë e tillë duhet t’i drejtohet Sekretarit, i cili do të lajmërojë për takimin të gjithë anëtarët, në pajtim me procedurat e shpjeguara në paragrafin 6.3.

6.3. Lajmërimi me shkrim për MPV dhe/ose MPJ, duke përfshirë datën dhe vendin e mbajtjes së mbledhjes, së bashku me rendin e ditës për takimin, do t’u shpërndahet të gjithë anëtarëve së paku shtatë ditë para ditës së mbajtjes së mbledhjes.

6.4. Për mbajtjen e mbledhjes më së paku është e nevojshme pjesëmarrja e 50% + 1 e anëtarëve. Nëse ky minimum (kuorumi) nuk arrihet, takimi do të shtyhet për një ditë të përcaktuar më vonë dhe lajmërimi i ri do t’u dërgohet të gjithë anëtarëve.

6.5. Secili delegat i Federatës ka një votë në Kuvend.

6.6. Vendimet në Kuvend do të merren me shumicën e votave të anëtarëve prezentë.

6.7. Secili anëtar i Kuvendit mund të abstenojë nga votimi ose marrja e vendimit për çfarëdo çështjeje për të cilën ai ose ajo ka interes personal ose ekonomik.

Neni 7 – Bordi

7.1. Përveç kompetencave të dhëna me këtë statut, Bordi është përgjegjëse për kontrollin dhe udhëheqjen e çështjeve dhe pasurisë së Federatës. Bordi duhet të veprojë çdo herë në pajtim me qëllimin e Federatës.

7.2. Përveç kompetencave të dhëna me këtë statut, Bordi do të ketë gjithashtu edhe këto kompetenca:   

         - Udhëheq në mënyrën më racionale mjetet dhe pasurinë e FEK,

         - zbaton konkluzionet dhe vendimet e Kuvendit,

         - përgatit mbledhjet e Kuvendit,

         - zgjedh nënkryetarët, sekretarin dhe arkëtarin e FEK,

         - zgjedh Këshillin mbikëqyrës të FEK,

         - zgjedh trupat punues të Bordit të FEK (komisionet),

         - propozon anëtarët e rinj për pranim në FEK,

         - organizon punët vijuese dhe të ardhshme të FEK,

         - përfaqëson Federatën dhe vepron në emër të saj,

         - emëron dhe zgjedhë përfaqësues, si dhe përcakton kompetencat dhe detyrat e tyre,

         - lidhë kontrata e marrëveshje,

         - realizon kompetencat dhe përgjegjësitë, që ia delegon Kuvendi. 

7.3. Bordi zgjedhet nga anëtarët e Federatës. Anëtarët e Bordit dhe kryetari do të zgjedhen individualisht nga Kuvendi me shumicë votash të anëtarëve të pranishëm.

Anëtari i Bordit zgjedhet për kohëzgjatje prej katër vitesh dhe do të ushtrojë detyrën deri në zgjedhjen e anëtarit të ri.

Mandati apo kontrata e punës mund të pushojë: në rast vdekjeje, dorëheqjeje ose shkarkimi nga detyra.

7.4. Bordi do të ketë 11 (njëmbëdhjetë) anëtarë: Kryetarin, dy nënkryetarë, sekretarin, arkatarin dhe 6 (gjashtë) anëtarë të tjerë.

7.5. Anëtarët e Bordit mund të zgjedhen për mandate të njëpasnjëshme.

7.6. Anëtarët e Bordit mund të shkarkohen para përfundimit të mandatit me votat e MPV-së dhe MPJ-së të Kuvendit.

7.7. Në rast të vdekjes, dorëheqjes ose shkarkimit të anëtarit të Bordit, Kuvendi duhet të zgjedhë pasardhësin për të shërbyer për kohën e mbetur.

7.8. Vendimet në Bord merren me shumicë.

7.9. Bordi mund të vendosë t’i drejtohet për çfarëdo çështje Kuvendit për marrje të vendimit.

7.10. Kurrëfarë pagese ose kompensimi nuk duhet t’u bëhet anëtarëve të Bordit pa aprovimin e Kuvendit dhe vetëm kur pagesa ose kompensimi është i arsyeshëm dhe bëhet për punën e kryer për Federatë.

7.11. Secili anëtar i Bordit mund të abstenojë nga votimi për marrjen e vendimeve, ose për çfarëdo çështjeje tjetër për të cilën ai ose ajo ka interes personal ose ekonomik.

Neni 8 – Zyrtarët dhe nëpunësit

8.1. Në rast nevojë, Bordi do të emërojë zyrtarë ose të pranojë persona që të marrin përsipër kryerjen e detyrave ditore të Federatës. Kohëzgjatja e punësimit të tyre duhet të caktohet nga Bordi, i cili duhet të informojë Kuvendin për emërime të tilla.

8.2. Zyrtarët duhet të punësohen përmes marrëveshjes së shkruar, e cila detajizon të gjitha të ardhurat dhe të mirat e tjera që duhet t’i paguhen zyrtarit. Të gjitha pagesat duhet të jenë të arsyeshme dhe duhet të paguhen vetëm punën e kryer për Federatë.

Neni 9 – Shpërbërja e Federatës

9.1. Federata mund të shpërbëhet me vendimin e 2/3 të anëtarëve të Kuvendit.

9.2. Kur të vendosë për  shpërbëjen e Federatës, Kuvendi do të tregojë emrin e shoqatës ose fondacionit që do të marrë pasurinë e mbetur pasi të jetë liruar nga detyrimet e Federatës. Shoqata(t) ose fondacioni(et) e zgjedhura duhet të kenë qëllime të njëjta ose të ngjashme sikurse Federata.

Neni 10 – Ndryshimet e statutit

10.1. Statuti i tashëm mund të ndryshohet me vendimin e shumicës së Kuvendit.

Neni 11 – Periudhat e raportimit dhe viti financiar

11.1. Bordi dhe zyrtarët e emëruar do të paraqesin raporte vjetore para Kuvendit, MPV ose kurdoherë që të kërkohet nga një MPJ.

11.2. Viti financiar i organizatës do të përputhet me vitin kalendarik. 

Ky statut është aprovuar në Prishtinë,

më 26 prill 2008

nga themeluesit e organizatës.